Nangin madinalag-on ang License to Own and Possess Firearms ukon LTOPF caravan nga ginpatigayon sang Negros Occidental Police Provincial Office (NOCPPO) sa EB Magalona, adlaw sang Biyernes.
Sa interview sang Bombo Radyo kay Lt. Abegael Donasco, deputy spokesperson sang NOCPPO, 156 ka mga indibidwal ang nagparenew ukon nagaparehistro sang ila mga firearms.
Suno kay Donasco, ginakalipay sini nga nangin dako nga bulig ang programa sa mga pumuluyo nga luyag magparehistro sang firearms ilabi na sa mga nagakinahanglan sini para sa safety purposes.
Suno diri, alas 7:30 nagsugod ang programa kag natapos alas 2:00 sang hapon kun sa diin 63 ka mga persona ang nagparenew sang firearms samtang 93 ang nagparehistro kag kalabanan diri ang mga sibilyan nga may mga delikado nga trabaho kaangay sang mga legal practitioners kag mga negosyante.
Suno sa tagpamaba, bangud sa nasambit nga programa, mahapos nalang para sa mga pumuluyo ang magkuha sang lisensya agud makaangkon sang armas luthang kag makabulig man ini sa NOCPPO bangud paagi diri, mabuhinan ang mga unrenewed, unlicensed kag unregistered firearms sa probinsya.
Nagpangagda man si Donasco nga may yara liwat sang patigayunon nga LTOPF Caravan sa ciudad sang San Carlos sa Hunyo 9 kag Hunyo 10.
