Nakapauli na sa Ilo-Ilo City ang duha ka menor de edad nga magkahagugma matapos na-rescue sang Bacolod City Mendicancy Division sang Department of Social Services and Development (DSSD).
Ang menor de edad nga lalaki ang naga-edad 16 anyos residente sang Dueñas, Iloilo samtang ang babaye naman ang naga-edad 12-anyos nga gin-deklarar missing halin sa Iloilo City.
Sa interview sang Bombo Radyo kay Alma Gustillo, Assistant Departmet Head sang DSSD, nag-abot sa Bacolod City ang magkahagugma sang Enero 29 kag nagpadulong sila sa Bais, Negros Oriental.
Suno kay Gustillo, Pebrero 2 sang nagbalik sa Bacolod City ang duha ka menor de edad kag tuyo kuntani nga magapauli sa ila nga lugar apang wala na sila sang ikaplete pa.
Suno diri, ginprenda ang 16-anyosang iya nga cellphone agud nga may ara sila sang ikagasto.
Dugang pa, naabtan man sila sang bagyo kun sa diin ginkansela ang byahe sang mga barko.
Bangud sini, ang duha ang temporaryo nga nagtinir sa 7-Eleven sa BREDCO sa sulod sang pila ka mga inadlaw kag may ara sang concerned citizen nga nagbulig sa ila kun sa diin didto natukiban nga ang 12 -anyos ang gindeklarar nga missing.
Gilayon naman nga nagpahibalo ang pumuluyo sa otoridad rason nga ini sila ang na-rescue.
Pahayag ni Gustillo, personal nga ginsugat sang Municipal Social Welfare and Development Office (MSWDO) ang babayi nga menor de edad kaupod ang iya iloy samtang nakabalik naman sa iya pamilya ang lalaki nga menor de edad.
