Patay ang 16 anyos nga lalaki matapos nga makuryente bangud natandugan ang live wire samtang nagaubra sa talamnan sa Purok Lopues, Barangay Dulao, Bago City, Negros Occidental sang Sabado, Hunyo 7.
Ang biktima ang ginkilala kay Jemuel Sta. Maria kag residente sang Purok Paghidaet, Barangay Sagasa, Bago City, Negros Occidental.
Sa interview sang Bombo Radyo Bacolod kay Police Lt. Col. Ariel Pico, officer-in-charge sang Bago City Police Station, ang biktima ang nagaatras samtang nagatanum sang humay kaupod ang iya iloy sa talamnan kag aksidente nga nasalapay ang nagaloyloy nga linya sang kuryente.
Suno kay Pico, ang linya sang kuryente ang may yara man sang nagatukod nga kawayan kag madugay naman nga may deperensya.
Ang linya sang kuryente ang natandog sang li-og sang biktima kag ginkuha pa sini sang iya kamot nga nasunog man.
Gilayon man nga ginreport sang Barangay Kagawad ang insidente kag gilayon man nga nagresponde ang mga kapulisan kaupod ang rescuer sang Bago City apang gindeklarar nga wala na sang kabuhi ang biktima.
Samtang nagpakig-angot na ang hepe sa tag-iya sang kuryente kag nagpasalig man nga maghatag sang bulig sa nalisdan.
