Pasakaan na sang kaso sa Lunes ang suspetsado nga gina-alegar naghimulos sa isa ka 16-anyos nga babaye sa ciudad sang Bago.
Suno kay Police Staff Sergeant Jennyvev Biasa, ang head sang Women and Childrens Protection Desk (WCPD) sang Bago City Police Station, natapos na nila ang mga kinahanglanon agud mapasakaan na sang kaso ang 18-anyos nga suspetsado nga ginkilala lamang kay Alyas Tupe nga gina-alegar naghimulos sa 16-anyos nga biktima sa Purok Proper, Brgy. Taloc, Bago City.
Nakaguwa naman ang resulta sang medical examination sa biktima kag nagpositibo ini sa laceration sa iya kinatawo.
Samtang ginpanginwala naman ni Biasa ang alegasyon sang iloy sang biktima nga nagpadulong sa Bombo Radyo Bacolod nga naghambal nga wala sang nag-atubang sa ila sang nagpadulong sa police station.
Suno kay Biasa, kahapon naka-schedule sila nga magkitaay sang iloy sang biktima apang bangud nga may ginreport man nga kaso sang isa pagkahilumos sa Pulupandan iya anay ini ginkadtuan.
Nahibaluan nga magluwas sa Bago CPS, nagaserbe man nga temporaryo nga WCPD head sang Pulupandan Municipal Police Station si Biasa.
Suno diri, nag-athaganay na sila sang iloy sang biktima.
