Ginalantaw nga 16 ka balay ang nasunog sa purok Paglaum, Brgy 17, Bacolod City, kapin alas- 8:00 sang gab-i, kagab-i.
Sa interview sang Bombo Radyo kay Mary Grace, residente sa lugar, gulpyada lang ini nakabati nga may nagsinggit nga sunog kag pagsteksyar sini , yara na sa likod sang ila balay ang kalayo.
Suno sa iya, halos nagatapikanay lang ang mga balay didto nga human sa light materials amo nga madasig ang paglapta sang kalayo.
Kalabanan man sa mga balay ang nagaserbe bilang boarding house.
Naghingagaw man ang mga pumuluyo salbar sang ila mga gamit kag kasapatan apang nangin mabudlay naman sa Bureau of Fire Protection (BFP) nga magpenetrate sa lugar bangod gamay ang alagyan kag may isa pa ka salakyan nga nakapark
Samtang, ginapatihan nga nag-umpisa ang sunog sa boarding house ni brgy Kagawad Rey Mirador.
Nagapabilin sa Barangay Hall ang mga evacuees kun sa diin inisyal nga nahatagan naman sang bulig gikan sa Department of Social Services and Development (DSSD).
Sa inisyal nga report, walo ka balay ang totally damaged kag pito naman ka balay partially damaged.
Samtang 25 ang renter kag 15 ka pamilya kun sa diin 57 ka indibidwal ang apektado.
