16 ka mga establisyimento sa ciudad sang Bacolod ang temporaryo nga ginsiraduhan matapos madakpan sa akto sang Emergency Operations Center contact tracing team nga nagaserbe sang makahulubog nga ilimnon nga lapaw na sa oras nga gintalana sa Executive Order sang alkalde angot sa general community quarantine.
Nahibaluan nga alas-12:00 sa udto tubtub alas-6:00 sa gab-i lang ang pagbaligya sang liquor.
Sa interview sang Bombo Radyo kay Major Sherlock Gabana, pinuno sang EOC contact tracing, sa Executive Order ni Mayor Evelio Leonradia indi pa pwede maka serve sang alcoholic beverages ang mga commercial establishments.
Mahimo lang makabaligya humalin alas 12:00 sang udto tubtob alas 6:00 sang gab-i apang indi ini dapat pag-imnon mismo sa lugar nga ginbaklan bangud napaidalom pa sa General Community Quarantine ang Bacolod City.
Suno pa kay Gabana, ang mga nadakpan nga nagainom ang ginkuhaan lang anay sang pangalan kag ginpicturan ang ila identification card.
Ang mga commercial establishments naman nga nagaserbe sang makahulubog nga ilimnon ang ginpasira sa sulod sang 24 oras kag ginhatagan sang notice of violation.
Kun liwat sila madakpan suno kay Gabana, igasanction na gid ang mga ini.
Pila sa mga lugar nga gin-inspect amo ang Barangay 7, 40 kag Villamonte.
Kalabanan naman sa mga ilimnan ang wala pa sang mga permit.
Wala man sila nag-issue sang citation ticket kag nagpasaka sang kaso bangud ini ang labing-una nga tion ang nadakpan gani ginwarningan lamang sila.
