Pilason ang isa ka 17-anyos nga babaye sa pagpangluthang nga nagluntad sa gwa sang ila puluy-an sa Purok Bantud, Barangay Pahanocoy, Bacolod City kahapon.
Sa interview sang Bombo Radyo kay Cipriano Japitana, lolo sang biktima, naglagaw ang apo sini kag ang bata ni Marvin Viso nga ginkilala lamang kay “Kim” apang wala na nakabalik ang bata sang suspetsado.
Suno kay Japitana, nagapati si Viso nga yara sa ila puluy-an kag ginatago ang iya nga bata gani sang Domingo sang gab-i, nagalibot-libot na ini sa ila balay.
Kahapon sang aga, naghambal ini nga kun sin-o ang magwa sa balay, iya pagatiruhon sang sulpak.
Suno kay Japitana, nagwa ang iya bata nga lalaki kag ini ang ginlagas ni Viso gani sila ang nagwa tanan lakip na ang mga kabataan.
Wala naglaom ang lolo nga mangluthang si Viso bangud may mga menor-de-edad apang padayon lang ini nga nagpalupok sang sulpak sa ila kag naigo ang apo sini nga 17-anyos sa natuo nga bahin sang iya lawas.
Gilayon ini nga gindala sa balay bululngan para sa nagakaigo nga pagbulong.
At large naman ang suspetsado.
Narecover sa crime scene ang isa ka empty fired cartridge case sang 12 gauge shotgun kag isa ka live ammunition sang 12 gauge shotgun.
Nagahingyo naman si Japitana sa suspetsado nga atubangon ang iya responsibilidad bangud menor-de-edad ang iya nahalitan.
