Patay ang 17-anyos nga driver sang motorsiklo samtang nagapabilin nga kritikal naman ang duha ka angkas sini matapos mabungguan sang elf truck sa Barangay Abu-abo, banwa sang Murcia, Negros Occidental, alas-3:00 sang Lunes sang hapon, Enero 11.
Sa interview sang Bombo Radyo kay Police Captain Honey Labaro, hepe sang Murcia Municipal Police Station, ang vehicle 1 nga SUV ang ginamaneho ni alyas “Joe”, 57-anyos, kasado kag residente sang Green Plains Subdivision, Barangay Singcang Airport, Bacolod City kag ang vehicle 2 nga Isuzu Elf ang ginamaneho ni alyas “Jemboy”, 27-anyos, resident sang Purok Victory, Barangay Minapasok, Calatrava, Negros Occidental ang lunsay nagapadulong sa ciudad sang Bacolod.
Ang Vehicle 3 nga Suzuki Smash ang ginamaneho naman sang 17-anyos, angkas ang 21-anyos kag ang 17-anyos nga lunsay residente sang Purok Leon, Barangay San Miguel, Murcia, Negros Occidental.
Suno kag Labaro, ang SUV ang yara sa outer lane sang hinali nga nagliko ang motorsiklo gani gilayon ini nga nagpreno kag nasagairan ang elf nga yara sa inner lane, kag aksidente nga nabunggo-an ang nagapadulong nga motorsiklo.
Bangud sini, ang driver sang motorsiklo kag ang isa nga angkas sini ang nahulog sa kanal kag naka-agom sang seryoso nga pilas samtang ang isa pa ka angkas ang nahulog sa dalan.
Gilayon nga gindala ang mga biktima sa Riverside Medical Center para sa nagakaigo nga pagbulong, apang ang driver sang motorsiklo ang gindeklarar nga dead on arrival.
Samtang ang driver sang SUV kag elf ang wala naman sang na-angkon nga injury.
Sa karun, ang duha ka angkas sang motorsiklo ang kritikal pa ang kondisyon.
Panawagan ni Labaro sa mga ginikanan nga indi tugutan ang mga menor de edad nga mag-drive sang motorsiklo.
