Patay ang isa ka 17 anyos nga lalaki matapos ginbuno bangud gina-alegar nga nagapalapta sang video scandal sa Carnenville Subdivision, Barangay 4, Hinigaran, Negros Occidental.
Santo sa inisyal nga imbestigasyon sang mga kapulisan sang Hinigaran Municipal Police Station ginpahibalo lamang sila sang staff sang Hinigaran Medical Clinic nga gindala sa ila ang Grade 12 student matapos nga mabun-an.
Santo sa pahayag sang pamilya nga kapin alas 9:50 ang takna sa gab-i sang Agosto 18, 2024 yara na ang mga ini sa sulod sang balay samtang ang biktima ang nagapungko sa bench sagwa sang ila sa balay.
Hinali sila nakabati nga daw may nagapanglampos sa ila pwertahan kag sang ginatsekyar ini, ang biktima ang nagsulod sa balay nga duguon kag natumba sa banyo.
Gilayon nga gindala sa Hinigaran Medical Clinic ang biktima apang gindeklarar nga dead on arrival.
Nakaagom ini sang duha ka buno sa dughan, isa sa liog, isa sa nawala nga abaga, isa sa natuo nga tuhod kag isa sa nawala nga tikod.
Sa interview sang Bombo Radyo Bacolod kay Police Lt. Col. Eduardo Corpuz, hepe sang Hinigaran Municipal Police Station, ginalantaw nga may kaakig ang naghimo sa biktima kag mahimo man nga ginsugo ang mga suspek nga naghimo sang krime.
Suno kay Corpuz, kun tripping lang isa lamang ka agi sang pagbuno, apang bangud sa madamo nga pilas sang biktima kag daw kaangay ginpabudlayan, nagapati ang mga ini nga ginhungod ang natabo sa 17 anyos nga estudyante.
Ginalantaw man nga motibo sa krimen ang alegasyon nga ini ang nagapalapta sang video scandal apang ginatinguhaan pa sang Hinigaran Municipal Police Station nga makakuha sang kopya agud mabasehan sa imbestigasyon kag matumod ang suspek.
Nagapati man ang hepe nga kilala sang biktima ang responsible sa krimen apang wala ini nagpanugid sa iya nga Lola.
