Patay ang 17 anyos nga lalaki matapos maglumpat sa ikalima nga panalgan sang isa ka mall sa ciudad sang Bacolod, kagab-i, alas- 9:20 sang gab-i .
Sa interview sang Bombo Radyo Bacolod kay PCapt Efren Legada, station commander sang Bacolod Police Station 1, sirado na ang mall apang bukas ang parking area kag didto nag-agi ang biktima para magsaka sa ikalima nga panalgan kag maglumpat.
Suno diri, ang biktima nag-agom sang pilas sa ulo, liog kag nagkalain-lain nga bahin sang iya lawas.
Gindala pa ini sa ospital apang gindeklarar nga patay na alas- 11:22 sang gab-i.
Suno kay Legada, wala man sang may natabo nga komosyon sa ila nga pamilya kag samtang ginacontact nila ang ila bata ginapatay sang biktima ang linya.
Wala naman sang kaupod ang biktima sang natabo ang insidente apang nagapangayo na ang kapulisan sang CCTV footage agud makita ang natabo.
Mensahe ni Legada sa mga ginikanan nga bantayan ang kabataan kag tsekyaron kun yara ang mga ini sa maayo nga kahimtangan.
