Patay ang 17 anyos nga lalaki bangud sa leptospirosis kasunod sang pagpaligo sa suba.
Ang biktima ang residente sang Barangay Bata, Bacolod City.
Kadungan sini ang Bacolod City Health Office ang nagapahumdom nga maghalong agud nga malikawan nga matapikan sang nasambit nga balatian.
Suno kay Dr. Grace Tan, Environment and Sanitation Division Head sang City Health Office, importante ang husto nga pagmanage sang basura nga isa sa mga nagapadamo sang ilaga sa palibot, kag pagsiguro nga wala sang mga barado nga drainage agud indi magbaha.
Suno kay Tan, dapat magsuksok man sang botas kun maglusong sa baha, kag sa karun nga rainy season likawan ang pagligo sa mga suba, irrigasyon, ukon tubig baha nga posible may bacteria nga nagadala sang leptospirosis.
Nagapangabay ang CHO nga kun maexpose sa mga kontaminado nga tubig, dapat gilayon magkadto sa health center para makainom sang preventive medicine.
Dugang pa, indi man pagpabay-an ang hilanat ukon iban pa nga sintomas kay basi ini ang palatandaan sang mas malala nga balatian.
