17 ka mga panimalay, 26 ka pamilya kag masobra 100 ka mga persona ang apektado sa pagseal off sang Purok Rosas Pandan sa Brgy. Cabug, Bacolod City matapos magtaliwan ang isa ka babaye nga nagpositibo sa coronavirus disease.
Sa interview sang Bombo Radyo kay Punong Barangay Zonuel Malayang, ginpahayag sini nga COVID-19 ang ila ginalantaw nga rason kun ngaa nagtaliwan ang isa ka residente sang tinalikdan nga Biyernes, Agosto 7.
Suno kay Malayang, wala ini nanugid sa barangay subong man sa iya mga kaingod nga nagalain ang iya pamatyag.
Sang nagpacheck-up ini upod ang iya nga bana, nagpaidalum ini sa swab test.
Agosto 6 sang gin-atake ini sang sintomas, nagtaliwan sang Agosto 7 kag nagwa ang resulta nga siya ang positibo sa COVID kahapon.
Suno sa punong barangay, may history sang hapo ang pamilya sang pasyente.
Gilayon naman nga nagpakig-angot ang barangay sa Bacolod Police Station 9 agud makordon ang purok.
Suno sa iya, una na nga ginseal-off ang balay sang pasyente kag ginhatagan sang ayuda ang pamilya sini.
Kahapon sang hapon, nagpanghatag naman sang ayuda ang barangay sa mga apektado sang lockdown.
