Gikan sa 55 ka mga barangay sa Negros Occidental nga ginrekomendar nga Election Areas of Concern, 51 diri ang naaprubahan sang Regional Joint Security Center.
Sa command conference nga ginpatigayon sa Camp Martin Delgado sa Iloilo City sang Huwebes, 172 ka mga barangay sa bilog nga Western Visayas ang na-aprubahan nga Election Areas of Concern.
Gikan sa 51 ka Barangay sa Negros Occidental, tatlo diri ang ginakabig nga red category ukon areas of grave concern.
45 naman ang orange category ukon areas of immediate concern kag tatlo ang yellow category ukon areas of concern.
Sa bilog nga Western Visayas, ang Iloilo amo ang may pinakamadamo nga Barangay nga nadeklarar Election Areas of Concern nga nagdangat sa 93, ginasundan sang Negros Occidental nga 51, Capiz nga may 14, Antique nga may 12 kag Aklan nga may duha ka Barangay.
Sa 172 ka Barangay sa Region 6 nga Elections areas of concern, anom diri ang yellow category, 163 ang orange kag tatlo ang red category.
Yara naman sa 3,879 ang Barangay nga makabig green category ukon areas of no concern sa bilog nga Region 6 kaangay sa syudad sang Bacolod.
Padayun pa sa karun ang evaluation sang Regional Joint Security Center gani may-ara pa sang posibilidad nga magsaka ukon maibanan ang mga barangay nga yara sa listahan sang Election Areas of Concern.
