Opisyal na nga nagtakop ang 17th Negros Island Organic Farmers Festival kag 2nd Terra Madre Visayas sang Sabado, Nobyembre 23.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, nagtakop na ang nasambit nga event kag subong pa nga adlaw mahibaluan kun pila ang revenue apang ginabanta nga nagdangat man ini sa P2.5 million.
Suno kay Lacson, magluwas sa organic farmers festival, ginpatigayon man ang 2nd Slow Food (Terra Madre) – Visayas.
Samtang dako man ang paglaom sang gobernador nga magadaog ini sa bidding agud nga mangin host sang 2027 World Organic Congress.
Suno diri, preparado naman ang probinsya sa paghost sang event.
Suno kay Lacson kun mangin madinalag-on, ginakonsiderar sini nga patigayunon ang event sa Capitol grounds, North Capitol Road, kag sa palibot sang lugar agud nga maaccommodate ang ginalauman nga pagtipon sang mga organic farmers gikan sa nagkalainlain nga bahin sang kalibutan.
Mahimo suno sa gobernador nga siraduhon ang north kag south sang capitol road sa paghost sang event.
Nakuha naman sang Negros Occidental ang pagkilala bilang Terra Madre of the Asia-Pacific region bangud sa padayon nga paghost sang slow food movement kag ang Negros Occidental lamang sa bug-os nga Pilipinas ang nakakuha sang nasambit nga pagkilala.
