Kaso nga rape ang ginaatubang sang 22 anyos nga lalaki nga gina-alegar naghimulos sa 18 anyos nga dalaga sa Talisay City, Negros Occidental, Nobyembre 9 sang gab-i.
Sa interview sang Bombo Radyo Bacolod kay Police Chief Master Sergeant Melinda Taganile, hepe sang Women and Children’s Protection Desk (WCPD) sang Talisay Police Station, residente sang Purok Malinong, Brgy. Bubog, Talisay City ang suspetsado nga si Clinton Pelayo.
Suno kay Taganile, mabakal kuntani sang ice ang dalaga nga kilala man sang suspetsado kag iya ini ginpasakay sa iya nga motorsiklo bangud mabakal man siya sang ice cream.
Nagpresentar man ini nga idul-ong papauli ang biktima kag bangud nga kilalahay man sila, nagpasugot ang dalaga apang wala ini naghuna-huna nga pagadal-on siya sa madulom nga lugar sa isa ka subdivision.
Suno sa hepe, nag-ako si Pelayo nga luyag niya makighilawas apang wala nagpasugot ang dalaga gani ginsumbag niya ini gamit ang brass knuckle ukon pichicorno gani nadulaan ini sang pangalibutan.
Sang nakabugtaw ang biktima, wala na ini sang pang-idalom nga panapton kag nagasampaw na si Pelayo sa iya apang nakapangita ini sang paagi nga makapalagyo kag makapangayo sang bulig sa mga residente.
Nagtuyo man nga magpalagyo ang suspetsado apang na-sideswipe ini sang isa ka ceres bus kag gindala sa Teresita Jalandoni Provincial Hospital kun sa diin man gindala ang dalaga kag sang nakit-an sini si Pelayo, gilayon niya ini nga gintudlo gani na-aresto sang mga pulis.
Sa karun, nakahunong si Pelayo sa Talisay City Police Station.
Sa pagbisita sang news team, gin-ako sini nga kursunada niya ang biktima apang wala niya ginpangaluyagan.
Sa piyak sini, gin-ako man sang soltero nga gintandog niya ang dalaga.
