Ikaw bala ang mahuyugon man sa mga treasure hunting movies?.
Maga-upod kaman bala kun ikaw ang hagadun sa isa ka matuod nga treasure hunt apang may dako nga kabaylo?
Isa ka lalaki sa India ang gin-aresto matapos nga gintuyo nga ilubong sang buhi ang iya nga bata nga babayi agud himuon nga “human sacrifice” sang tinalikdan nga Miyerkules, Abril 27.
Ginapahayag nga kabahin sang isa ka “hidden treasure hunt” ang ritwal nga pagpatay.
Santo sa otoridad, nasalbar sang mga ini ang 18 anyos nga babayi antes paman ini patyon sang iya amay kag ang walo pa sini nga kaupdanan, kalakip ang isa ka Hindu tantric priest, sa ila mismo nga puluy-an sa Maharashtra state.
Pahayag sang kapulisan nga nadiskubrehan ang buluhaton sang mga suspect bangod sa tip gikan sa abyan sang biktima.
Suno kay Yavatmal district police chief Dilip Bhujbal Patil, ano man nga oras mahimo na nga patyon sang suspetsado ang iya bata, apang ini ang nadakpan sa akto.
Nahibaluan nga nabatian sang biktima ang iya nga amay nga gina-estoryahan ang plano nga human sacrifice gani ginsugid sini sa iya nga abyan nga yara sa peligro ang iya nga kabuhi.
Antes gindakop ang mga suspetsado, nagkutkot na ang amay sa ila ugsaran agud nga didto kuntani ilubong ang iya nga bata.
Ginkasuhan ang mga suspetsado, kag isa ka separado nga imbestigasyon ang ginapatigayon nahanungod sa gina-alegar pagpanghimulos sang amay sa manghod sang biktima.
Santo sa mga otoridad, madamo na nga mga bata ang nadulaan sang kabuhi sa kaangay nga ritwal apang wala sang opisyal nga datos angot diri.
Sang damlag lang, duha ka mga kabataan nga naga-edad tatlo tubtob pito ka tuig ang ginpatay sa magkatuhay nga human sacrifice sa India.
Santo naman sa kapulisan sa Odisha state, nga isa ka iloy ang naglaslas sang leog sang iya mismo nga lapsag sang Abril bangod wala ini nakakuha sang kanding nga sakripisyo sa isa ka lokal nga templo.
