18 anyos nga lalaki, arestado matapos maaktuhan nga ginavandalize ang Barangay Hall sa Barangay Villamonte

Arestado ang 18 anyos nga lalaki matapos maaktuhan nga nagavandalize sa pader sang Barangay Hall sa Barangay Villamonte, Bacolod City kahapon alas-4:45 sang kaagahon.

Ang suspetsado ang ginkilala nga si Jason Vargas, 18 anyos, estudyante, residente sa Bangga Ceres, Barangay Mansilingan.

Samtang nagabantay ang mga katapo sang Bacolod Police Station 4 sa Dinagyaw Festival sang Barangay Villamonte, naaktuhan nila mismo nga ginavandalize ni Vargas ang pader sang Barangay Hall gamit ang gray nga pinta nga nasulod sa improvised plastic container.

Ang estudyante ang yara na sa kustodiya sang Bacolod Police Station 4 kag natalana nga mangatubang sang penalidad sa paglapas sa City Ordinance No. 534 ukon Anti-Vandalism Ordinance of Bacolod City.