Narescue ang 18 anyos nga lalaki matapos nga mahulog sa bubon samtang nagapangita sang damang sa Barangay Cabug, Bacolod City.
Sa interview sang Bombo Radyo Bacolod kay Efren Sayon Jr., Fire Chief, Community Fire Auxiliary Group-Handumanan, may yara sang nagdalalagan nga mga kabataan agud magpangayo sang bulig kag gilayon man nila nga ginrespondehan.
Suno kay Sayon, ang mga bata ang nagpangita sang damang sa lugar.
Suno diri, isa sa mga ini ang nagpahayag nga may nakita nga damang kag ang 18 anyos ang nagpresentar nga magkuha sini.
Ginhambalan ini sang kaupod nga pabay-an na lamang ang damang kag indi nalang kuhaon apang ini ang nag-insister sa gihapon.
Apang ini ang hinali na lamang nga nakadalin-as kag nahulog sa abandunado nga bubon.
Nagpangayo man sang bulig ang mga kaupdanan sini, kun sa diin sila ang nagtalang-talang pa antes natigayon nga marescue ang biktima.
Nakasurvive ang bata bangud nakahibalo ini maglangoy kag nakatungtong sa bato sa kilid sang bubon agud nga makatakas sa tubig.
