Patay ang 18 anyos nga soltero matapos nga malumos sa suba sa bahin sang Purok Water Lily, Barangay Binubuhan, Bago City, Negros Occidental.
Ginkilala ang biktima kay Ezekiel Arguelles alyas Kyle kag residente sang nasambit nga lugar.
Santo sa impormasyon nga natipon sang Bombo News Team, kaupod ang pakaisa, ang biktima ang nagwashing sang iya motor sa suba.
Apang matapos nga magpanghugas sang motorsiklo, naglumpat sa suba si Arguilles agud nga magpaligo apang gindala ini sang current sang tubig sa sulod sang tamburong.
Gintabunan naman sang mga residente sang plywood ang buho sang tamburong gani naglutaw ang 18 anyos apang madamo na sang nainum nga tubig bangud nagbug-at na ini.
Wala man natalupangdan sang pakaisa ni Arguilles nga nagpaligo ini sa suba.
Samtang nakita naman ini sang iban nga tricycle drivers nga nagapanghugas sang ila tricycle nga naglumpat sa suba ang biktima.
Ginalantaw man nga nakabunggo ang ulo sini sa tamburong gani nalipunggan ini kag wala na nakagwa sa tamburong.
Sa interview sang Bombo Radyo Bacolod kay Jobert Alicante, Rescue Team Leader sang Ma-ao Volunteers Rescue Unit (Mavru Team), nakabaton sila sang tawag nga may nalumos pasado alas 2:00 ang takna sang hapon kag gilayon man nila ini nga ginrespondehan.
Suno kay Alicante, ginrevive nila ang biktima tubtob sa Bago City Hospital.
Gindala man si Arguilles sa emergency room kag didto na gindeklarar nga nadulaan na sang kabuhi.
