Tuman ang pasalamat sang amay sang 18 anyos nga babayi nga special child nga nadula sang Lunes sang hapon bangud nakita na ini matapos nga nagpanawagan sa Bombo Radyo Bacolod.
Kahapon nagpadulong sa estasyon sang Bombo Radyo Bacolod si Alfredo Raffles ang amay sang nadula nga si Jenerose Raffles agud nga ipanawagan ang nadula sini nga bata.
Matapos nga mapost sa social media ang panawagan sang amay, madamo man sang netizen ang nagshare sini tubtob nga nahibaluan nga ini ang yara na sa paghinakop sang social worker sang Barangay Alijis syudad sang Bacolod.
Sa interview sang Bombo Radyo Bacolod kay Alfredo Raffles, mga alas 2:00 ang takna sang hapon sang Lunes, nagbiyahe ini sang trisikad bangud ini ang ila ginakuhaan sang ila nga pang adlaw-adlaw sang iya bata apang sang nagpauli ini, wala na sa ila balay sa Purok Sawmill, Barangay Bata ang iya anak gani ginpangita niya ini.
Kahapon sang aga, nagpangayo ini sang bulig agud nga mapanawagan ang nadula niya nga bata.
Bangud sa bulig sang mga followers sang Bombo Radyo Bacolod madasig nga natultulan kun sa diin ang iya anak.
Kahapon sang hapon, kaupod sang amay ang Bombo News Team kag si Barangay Kagawad Harvey Apinan sang Barangay Bata.
Ginturn-over naman sang social workers sang Barangay Alijis kay Alfredo Raffles kag kay Barangay Kagawad Apinan si Jenerose Raffles.
Halin sa Barangay Alijis gindul-ong sang Bombo News Team ang mag-amay sa ila balay.
Suno kay Alfredo Raffles, dako ang pagpasalamat sini nga nakita na niya ang iya nga anak.
Nagpanawagan man ini sa kun sin-o man nga may maayo nga kabubut-on nga mahimo makabulig sa ila bangud solo lamang ang amay nga nagabiyahe sang sikad ang nagabuhi sa ila kag ini ang may edad naman.
Napatay naman ang asawa ni Alfredo ang iloy sang special child.
