Nakasuhan na ang 18-anyos nga suspetsado sa paghimulos sa 16 anyos nga babayi sa siyudad sang Bago.
Sa interview sang Bombo Radyo Bacolod kay Police Staff Sergeant Jennyvev Biasa, ang head sang Women and Children’s Protection Desk (WCPD) sang Bago City Police Station, kaina sang aga ginkasuhan sang rape si Alyas Tupe.
Madumduman nga positibo sa laceration ang kinatawo sang 16 anyos nga ginhimuslan sa Purok Proper, Brgy. Taloc, Bago City tinalikdan nga semana.
Sa pihak nga bahin, gin-athag naman sang pulis nga lolo kag indi tiyo ang suspetsado nga naghimulos sa 11 anyos sa Purok Bulak sang Bulak, Brgy. Poblacion, Bago City tinalikdan nga bulan sang Oktubre.
Suno kay Biasa, amay sang iloy sang bata ang suspetsado.
Ang biktima ang una nga nanugid sa iya nga abyan apang sang ulihi nagpanugid ini sa iya nga amay.
Nahibaluan nga yara sa luwas sang pungsod nagatrabaho ang iloy sang bata.
Ang biktima ang nagaistar sa banwa sang Pulupandan apang sa Bago ginhimuslan.
