Indi magnubo sa 18 ang narecord nga kaso sang illegal discharge of firearms humalin Desyembre 16, 2021 tubtob Enero 2, 2022 santo sa Philippine National Police (PNP).
Mayorya sang mga insidente ang ginbuhat sang mga sibilyan.
Nakarecord man ang PNP sang apat ka gina-aligar stray bullet incidents sa Ilocos, Calabarzon, Northern Mindanao kag Cordillera Regions.
Gikan diri, isa ka biktima sa Batangas ang naigo sang layaw nga bala sa ulo kag sa karun padayun pa nga ginabulong sa ospital.
Isa naman ka babayi sa Sinait, Ilocos Sur ang nasamaran mataos nga maigo sang layaw nga bala samtang nagalantaw sang telebisyon sa New Year’s Eve.
Sa karun, yara na ang pasyente sa maayo nga kahimtangan samtang nagapadayun naman ang pag-imbestigar sang mga otoridad sa kaso.
Duha naman ka mga suldado ang nagapangatubang sang six counts of frustrated murder matapos nga gina-alegar nagpaniro sang mga sibilyan samtang naga-inom sang alcohol kadungan sang Christmas Day, kun sa diin anom ang nasamaran kalakip na ang tatlo ka minors.
Ginakondenar sang Commission on Human Rights ang natabo nga pagpalupok sang armas kag nagpahayag nga paga-imbestigaran ang kaso.
Santo naman sa PNP, wala sang nareport nga firing kag stray bullet incidents gikan sa police force kag private gun owners sa tion sang paskwa.
Ginpahayag pa sang PNP nga nagnubo sang 20 porsyento ang crime incidents sa pungsod humalin Disyembre 1 tubtob 27, 2021 kun ipaanggid sa kaangay nga petsa sadtong 2020.
