18 ka mga local government units sa Negros Occidental ang nagsuspender sang klase subong nga adlaw bangud sa malain nga tiyempo.
Sa interview sang Bombo Radyo kay Provincial Administrator Atty. Rayfrando Diaz, nagdeklarar sang suspension sang klase subong nga adlaw ang mga alkalde sang Pontevedra, Calatrava, Sipalay, Isabela, Murcia, EB Magalona, Talisay, Silay, Moises Padilla, Binalbagan, Himamaylan, Pulupandan, Kabankalan, Don Salvador Benedicto, San Enrique, Valladolid, Candoni kag Hinigaran.
Suno kay Diaz, wala sang nareport nga pagbaha sa probinsya apang kahapon, may pre-emptive evacuation nga ginpatigayon sa Bago City matapos may nagkalaguba nga pamalay sa Barangay Busay kag Barangay Taloc bangud sa makusog nga hangin.
Suno diri, 13 ka pamilya ang naapektuhan kag yara sa karun nagapuyo sa ila mga himata kag kaingod.
May mga evacuation man nga ginpatigayon sa mga banwa sang Cauayan kag Hinobaan kahapon.
Samtang, 16 naman ka pamilya sa Don Salvador Benedicto ang yara sa karun sa evacuation center.
Suno kay Provincial Disaster Management Program Division (PDMPD) Focal Person Irene Bel Plotenia, 20 ka pamilya ang nag-evacuate sa DSB kun sa diin 16 ang yara sa evacuation center samtang apat naman ka pamilya ang nagtinir sa luyo sang ila mga himata.
Suno kay Plotenia, may nareport nga landslide sa Sipalay sang Mayo 30 gani under monitoring ini sa karun.
Sa banwa sang Hinigaran, may kalan-an man nga naguba bangud sa makusog nga hangin.
Wala naman sang reported pa nga pagbaha sa banwa sang Hinobaan.
Sa ciudad sang Kabankalan, may nareport naman nga nadamage nga lima ka mga motorsiklo matapos nga natumbahan sang dako nga puno bangud sa mabaskog nga hangin.
