Nakasuhan na ang Grade 11 student nga nakuhaan sang 36.58 grams sang suspected marijuana sa sulod sang Manapla National High School sa Barangay 1-A, Manapla, Negros Ocidental sang Lunes.
Sa interview sang Bombo Radyo kay Police Major Jaynick Bermudez, hepe sang Manapla Municipal Police Station, nakita sang manunudlo nga sanday Lodelyn Balena kag Rey Ann Alvito ang siyam ka putos sang marijuana sa bag sang estudyante nga si Jemuel Dinorog, 18 anyos residente sang nasambit nga barangay bangud bukas ang iya nga bag.
Nakig-angot ang mga manunudlo sa kapulisan nga suno kay Bermudez kag yara man ang Department of Social Welfare and Development sa pagpati nga menor de edad ang estudyante, apang nahibaluan nga 18 anyos na ang estudyante nga si Dinorog.
Nakuhaan ini sang 36.58 grams sang suspected marijuana nga may balor nga kapin P4,200.
Sa karun, yara na sa kustodiya sang Manapla Municipal Police Station ang suspetsado.
Kadungan sini, nagpanawagan si Bermudez nga bantayan ang mga kabataan nga indi maimpluwensyahan sang kalainan kag mag-eskwela sang maayo.
