Makaligad ang dose ka oras humalin sang ini ang ginreport nga gin-abduct sang mga suspetsado nga nagasakay sa pick up sa EB Magalona, nasapwan nga patay ang 18-anyos nga sultero sa Victorias City.
Ang biktima nga si Roger Hellacone Jr. sang Hacienda Carmelo, Brgy. Sto. Niño ang gin-abduct sang mga suspetsado nga nagasuksok sang maskara samtang nagahampang ini sa computer shop sa Brgy. Tanza Proper pasado alas-8:00 kagab-i.
18-anyos, gin-abduct sa EB Magalona? Mga suspetsado nagasakay sa pick-up
Kaina sang aga, nasapwan si Hellacone nga wala na sang kabuhi sa katubuhan sa Hacienda Newton, Malugo, Victorias City.
Santo sa initial nga pag-usisa, may pilas sa ulo tuga sang pagkaluthang si Hellacone.
Sa karun, blanko pa ang mga pulis sa mga suspetsado.
Sa interview sang Bombo Radyo Bacolod sa kaupod ni Hellacone sa computeran nga nagpakilala lamang kay Mark, mata lang sang mga suspetsado ang kitaon kag sila ang nagasuksok sang jacket.
Suno diri, mabukod ang lawas kag mataas ang mga suspetsado nga lunsay may mga armas.
Gin-alegar man sini nga lain ang lingwahe sang mga suspetsado nga nagsakay sa silver nga pick up nga wala sang plate number.
Tatlo ka mga lalaki ang nagsulod sa computer shop sa Brgy. Tanza Proper, EB Magalona kag amo ang nag-abduct kay Roger Hellacone sang Hacienda Carmelo, Brgy. Sto. Niño kagab-i nga nasapwan nga patay kaina sang aga.
Sa interview sang Bombo Radyo Bacolod sa tag-iya sang computer shop nga nagpakilala lamang kay Ann, gindumdum niya magaorder sang pamahaw ang tatlo ka mga lalaki apang wala man sila nagsabat sang ginpamangkot.
Ginpangita sang mga suspetsado si alias Paka kag sang nag-huo si Hellacone, ginpaupod nila ini sa gwa sang computer shop kag ginpasakay sa pick-up nga silver.
Nabatian man nanday Ann nga namitlang sang biktima ang iya manang antes nagsaka sa salakyan nga madasig nga nagbiya sa lugar.
Wala sang CCTV camera sa computer shop.
Ginalantaw sang magulang ni Roger Hellacone nga mahimo may kaangtanan sa illegal nga droga ang motibo sa pag-abduct kag pagpatay sa iya sang mga suspetsado nga wala pa natumod tubtob subong.
Sa interview sang Bombo Radyo Bacolod kay Lindy Hellacone, nagaduso sadto sang shabu ang iya manghod kag tinawo ini sang ginatudlo drug group leader nga si Alson Aguirre.
Madumduman nga si Aguirre ang napatay matapos gina-alegar nagbato sa mga pulis nga nagpatigayon sang buybust operation sa Hacienda Bariw, Brgy. Santa Teresa, Manapla, Negros Occidental sang bulan sang Marso subong nga tuig.
Suno kay Lindy, nakaagi nga ginsugo ang iya manghod nga magbaligya sang illegal nga droga apang kulang ang ginhatag sini nga kwarta.
Sang napatay si Aguirre suno kay Lindy, nag-untat naman sa illegal nga buluhaton ang iya manghod.
Magluwas diri, nagasuspetso man ang magulang nga mahimo may kaangtanan sa pagkadula sang cement mixer sa ila barangay ang pagpatay sa iya manghod.
Suno kay Lindy, ginpasibangdan si Roger nga siya ang nagkawat sang mixer apang indi ini matuod.
Nagahilibion naman ang magulang samtang nagapalab-ot sang mensahe sa mga suspetsado nga indi mabaydan sang ila kabuhi ang kabuhi sang iya manghod.
Sa karun, gina-imbestigaran pa sang EB Magalona Municipal Police Station ang motibo sa krimen.
Suno sa hepe nga Police Captain Wilfredo Benoman, ginapadalman pa ang background sang biktima kag ginatumod kun may kaangtanan ini sa illegal nga droga.
Suno kay Benoman, wala sa drugs watchlist si Roger.
