Arestado ang 19 anyos nga lalaki sa paglapas sa Republic Act 10591 ukon Comprehensive Firearms and Ammunition Regulation Act matapos madakpan nga nagapasayang-sayang sang armas luthang sa Purok 4, Barangay 2, Sipalay City.
Ang suspetsado ang ginkilala nga si Carl Andrew Tayucon, 19 anyos, single, residente sang Purok Pagulingan, Barangay Haba, Candoni, Negros Occidental.
Sa interview sang Bombo Radyo Bacolod kay Police Lt. Col. Fernando Somblingo Jr., hepe sang Sipalay City Police Station.
Sila ang nakabatun sang report gikan sa isa ka concerned citizen matapos sini makita nga nagalakat sa Alejano Street, Barangay 2, Sipalay City si Tayucon samtang sukbit sa hawak ang armas-luthang.
Ini ang gilayon man nga ginresponderan sang mga kapulisan, kag natigayon nila nga maaktuhan ang suspect.
Nakuha sa paghinakop sini ang isa ka unit sang cal. 9Mm pistol, siyam ka live ammunitions ukon bala sang cal. 9Mm, duha ka magazine kag isa ka tactical sling bag.
Gina-imbestigahan pa sang mga kapulisan kun paano nakahupot sang nasambitan nga mga pagkabutang ang 19 anyos nga suspect.
Sa inisyal nga imbestigasyon, si Tayucon ang ginaalegar ginasikway na sang iya pamilya sa banwa sang Candoni kag gikan pa sa banwa sang Hinobaan antes nagaboard sa Sipalay City kun sa diin ini ang madamo sang abyan.
Pagalantawon pa sang kapulisan kun may mga kaso ang suspect sa mga lugar nga iya ginhalinan.
Sa karun ini ang nakahunong sa detention facility sang Sipalay City Police Station, kag ginatinguhaan nga mafile ang kaso subong nga adlaw.
