19 ka mga empleyado sang Provincial Government sang Negros Occidental ang nag-positibo sa paggamit sang illegal nga droga kasunod sang ginpatigayon nga surprise drug test sang tinalikdan nga Disyembre 18, 2024.
Suno kay Provincial Administrator Atty. Rayfrando Diaz II, sa 19 nga nagpositibo, tatlo ang permanent employees, pito ang job order workers, tatlo ang contract-of-service workers, kag anom ang mga blue guards.
Suno kay Diaz, wala na ginrenew ang kontrata sang mga Job Order kag contractual workers subong nga Enero samtang ang permanent employees ang ipaidalom naman sa confirmatory test.
Kun liwat mag-positibo ang mga ini, sila ang tanyagan nga magpaidalom sa drug rehabilitation program kun luyag nila nga mareinstate sa serbisyo.
Apang ang magpabalibad naman sa pagpa-rehab ang pasakaan sang kaso nga Grave Misconduct.
Nahibaluan nga kabug-usan nga 1,800 ka mga Capitol employees ang ginpaidalom sa surprise drug test nga ginalakipan sang 1,100 nga nakabase sa kapitolyo samtang 700 naman ang assigned sa mga ospital nga ginadumala sang probinsiya.
Ini ang kabahin sang kampanya sang Provincial Government nga mangin drug-free workplace ang kapitolyo probinsyal.
