Ginkustodiya na sang Bureau of Internal Revenue (BIR) kaupod sang Bureau of Customs (BOC), ang 19 ka mga motor vehicles may kaangtanan sa Discaya tax investigation ukon ang ginatawag nga “Discaya cars”.
Kinse sa mga salakyan nga narehistro sa mag-asawa nga sanday Pacifico F. Discaya II kag Cezarah Rowena Discaya ang ginpaidalom sa constructive distraint.
Apat ka mga salakyan ang ginpaidalom sa constructive seizure may kaangtanan sa tax assessment batok sa St. Gerrard Construction General Contractor & Development Corporation.
Ginpaathag ni BIR Commissioner Charlito Martin R. Mendoza nga ang katuyuan sang nasambit nga tikang amo ang pagpreserbar sang mga assets kag pagsiguro sang ikasarang sang gobyerno sa pagkolekta sang buwis samtang nagasunod sa nagakaigo nga proseso.
Ginpasalamatan man sini ang matawhay nga koordinasyon kag dokumentasyon sang BOC.
Madumduman nga sang 2025, nagpasaka sang criminal tax cases ang BIR batok sa mga Discaya nga may kabug-usan nga tax liabilities nga P7.18 billion.
Ang ini nga tikang ang kabahin sang Revenue Collection and Base Protection sa idalum sang BIR DARES batok sa tax evasion kag non-payment.
