Ginpatigayon na ang demolition sa mga road obstructions kag illegal structures sa Brgy 14 kag Brgy 16, Bacolod City.
Sa interview sang Bombo Radyo Bacolod kay Retired Police Col. Levy Pangue, team leader sang Legal Enforcement Team, nahatagan naman sang tion ang mga subject sa demolition nga boluntaryo nga magguba sang ila propedad agud makuha pa nila ang mga mapuslan nga materyales.
Nahibaluan nga 19 ka mga propedad ang nadagdagan sang notice to vacate.
Suno kay Pangue, wala naman sang pagpamatok gikan sa mga tag-iya sang gindemolish nga propedad bangod nakahibalo man ang mga ini nga sila ang yara sa sala.
Luwas sa road obstruction, ginlakip na lamang sa demolition ang tangkal sa kilid sang creek.
Apisar nga ini ang indi kabahin sa road obstruction, ini ang ginakonsiderar nga illegal structure.
Panawagan ni Pangue sa mga tag-iya sang propedad nga magkooperar na lamang sa demolition. Samtang, naghingyo ang tag-iya sang baboyan nga nalakip sa ginpademolish sa Brgy 16, Bacolod City nga hulaton na lamang tubtob nga mapull-out ang baboy bangod sa karun ang ila nga baboy ang alang-alang pa nga mabaligya kag wala man sila sang masayluhan.
Sa interview sang Bombo Radyo Bacolod kay Epipania Vergara, sila ang gindemolish na sang nakaligad sang nagclearing sa mga structure nga nagabara sa waterways.
Apang pahayag sang backhoe operator nga indi na tandugon ang ila tangkal kun yara lamang sa ibabaw sang pangpang.
Apang sa ginpatigayon nga road clearing, ginapahayag sini nga sila ang naulamid matapos nga may nagreport sa ila bilang illegal structure.
Suno diri, manug duha ka bulan pa lamang ang ila mga baboy kag ini ang alang-alang pa kun lechonon.
Naga-ayo sila kay Mayor Greg Gasataya nga pahanugutan nga makapabilin anay sa lugar tubtob nga mapagwa na ang baboy, bangod sila ang wala gid sang masayluhan.
May balay man ang mga ini sa suludlon sang Brgy 14, apang indi man madala ang baboy bangod tuluparay lamang ang mga pamalay, indi kaangay sa kilid sang pangpang nga wala sang iban nga maperwisyo.
Suno kay Vergara, ang baboy lamang ang ginasaligan nila sa pagpa-eskwela sang ila bata nga kolehiyo, nga may ginabayaran nga P4,000 sa kada exam.
Dugang pa niya nga senior citizen na ang iya nga bana, kag sila ang wala na sang iban pa nga palangitan-an.
Apang sa pihak sini, sila ang ginhatagan lamang sang Bacolod City Legal Enforcement Team sang tubtob lunes agud masaylo ang ila baboy bangod padayunon na ang demolition.
