Dako ang pagpasalamat sang Bacolodnon kag First ever female pilot nga si Coast Guard Commodore Christine Pauline Diciano sa iya nga promotion.
Sa interview sang Bombo Radyo Bacolod kay Diciano nagapasalamat ini sa appointment kag approval ni President Ferdinand “Bongbong” Marcos Jr. kag sa endorsement sa liderato sang Philippine Coast Guard kag sa Department of Tourism sa iya nga promotion.
Suno kay Diciano bangud sa promotion ginalauman na sini ang dugang nga duties kag responsibilities nga ihatag sa iya.
Sa karun nagahulat nalang ini sang guidance nagikan sa higher headquarters.
Suno diri magluwas sa iya may yara man sang ginpromote nga first ever rear admiral sang PCG.
Siya amo si Rear Admiral Mitzie Silva-Campo.
Ginpahayag man sini nga sa ila nga batch sa Philippine Coast Guard may yara na sang masobra lima ka mga babayi nga napromote sa ranggo nga Commodore.
Samtang ginpasalamatan ni Diciano ang tanan nga educational institution nga naghone kag nagshape sa iya agud malab-ot sini kun ano man siya sa karun.
Pahayag sini nga bangod yara man sa PCG ang iya amay, sadto paman idolo nya na ini gani wala ini nagduhaduha nga magsulod sa kaangay nga public service.
Suno kay Diciano, siya ang gintudluan sang iya iloy nga ang pakigkapwa-tao ang halungan gid kag hakson ang tanan apisar sang ila nga diversities.
Dugang pa sini nga dapat kita ang makahibalo nga magrespeto sang mga opinyon sang mga tawo bisan indi pa naton ini nagustuhan.
Samtang, nagpangayo man ini sang pasaylo sa iya pamilya sa mga missed milestones apang ginapanumdom sini nga ang iya pamilya ang source sang iya kabakod kag inspirasyon sa pagserbisyo sa publiko.
Ginapahanumdom sini pirme sa iya mga kabataan mangin kind and good sa tanan nga tion kag luyag man sini nga magbilin sang legasiya nga mahimo ang mga ini makahatag sang maayo nga pagserbisyo sa publiko.
