Nag-abot na si Fist Lady Liza Araneta Marcos sa covered court sang University of Negros Occidental – Recolletos (UNO-R) kun sa diin ginapatigayon ang ‘Lab for All’ Caravan project sini.
Ang proyekto ang nagatuyo nga maghatag sang libre nga konsultasyon kag bulong sa ginabanta 1,500 tubtob 2,000 nga benepisyaryo.
Napuno naman ang covered court sang mga benepisyaryo kag madamo pa sang mga nagahulat sa gwa nga wala nalakip sa listahan apisar nga alas-9:00 ginsirad-an na ang venue agud maregulate ang crowd.
Ginhatagan naman sang prayoridad ang mga nagabusong samtang ang mga pasyente nga nakasaklay ang ginhatagan man sang libre nga wheelchair.
Ang mga pasyente ang magasaka sa van kun sa diin nakahamtang ang mga doktor nga magakonsulta, kag kun kinahanglan sang laboratory test kag iban pa, sila ang ginarefer naman sa iban nga area.
Yara sa aktibidad si Bacolod City Mayor ‘Albee’ Benitez, Congressman Greg Gasataya, mga konsehal kag Punong Barangay sa Bacolod City, kasubong man pila ka opisyal gikan sa Negros Occidental Provincial Government kag mga pamunuan sang nagkalainlain nga ahensya sang gobyerno.
