BACOLOD CITY—Target sang pinakauna nga gold medalist kag record breaker sang Western Visayas sa Palarong Pambansa 2018 nga mangin back-to-back champion kag liwat nga maka-break sang record sa masunod nga tuig.
Si Ann Katherine Quitoy, 17-anyos, tumandok sang Valencia, Negros Oriental kag estudyante sang Romanito Maravilla National High School sa Brgy. Estefania ciudad sang Bacolod ang pinakauna nga gold medalist sang Region 6 kag record breaker sang nakahaboy ini kahapon sang 45. 72 meters sa Javelin Throw Secondary Girls.
Naguba sini ang record ni Sylvian Abunda sang 2017 nga 42.85 meters.
Bangud nga sarang pa ini nga makahampang liwat sa Palarong Pambansa sa 2019, luyag sini nga makakuha liwat sang gold medal kag makahimo sang bag-o nga record.
Suno diri, natuman na ang iya damgo sang una kag handom man sang iya mga ginikanan nga mangin gold medalist sa Palarong Pambansa.
Suno kay Quitoy, maayo nga kondisyon sang lawas, determinasyon, sakripisyo, pagpanikasog kag pagpangamuyo lamang ang iya nga sekreto.
Suno pa kay Quitoy, nahilig ini sa Javelin Throw bangud nga sang bata pa siya mahilig siya mang-bangkay sang mangga.
Samtang Ginhatagan pagtamod sang coach sang pinakauna nga gold medalist kag record breaker sang Western Visayas sa Palarong Pambansa 2018 nga tuman nga preparasyon ang sekreto sa madinalag-on sini nga kampanya sa Javelin Throw.
Si Adriana “Addie” Arca ang coach ni Ann Katherine Quitoy gikan man mismo sa Romanito Maravilla National High School sa Brgy. Estefania ciudad sang Bacolod.
Suno diri, ginhandaan gid nila upod sang iya man utod nga si Coach Miggy Arca ang pagbalik sang Negros Occidental sa Western Visayas agud nga mangin maayo ang performance sa Palarong Pambansa.
Nagapati si Coach Addie nga “stronger Western Visayas” sa Palarong Pambansa ang pagbalik sang Negros Occidental.
Overwhelmed ini sa nakuha nga record ni Quitoy apang padayon ang paghingyo sini sang pangamuyo kag suporta sa iban pa nga mga hampang sa Athletics sang iya nga mga players tubtob matapos ang national sporting event.
Nahibaluan nga selection sang una sang Negros Occidental si Quitoy sang buhi pa ang Negros Island Region kag nagpasakop ini sa Palarong Pambansa sa probinsya sang Antique.
Nakita sini ang potential ni Quitoy gani nga ila ginkuha kag gindala sa Romanito Maravilla National High School.
