Pila ka mga butang ang ginpatpat ni Bacolod City Mayor Alfredo “Albee” Benitez sa iya una nga State of the City Address (SOCA) sa Bacolod City Government Center kahapon sang hapon.
Ginpatpat sang alkalde ang mga nangin programa kag mga pagbag-o nga nahimo sang iya administrasyon sa nakaligad nga isa ka tuig.
Samtang ginapanindugan naman sini nga kaangay sa ginpromisa sang eleksyon, nakapatigayon na ini sang mga pagbag-o sa Bacolod City.
Pahayag sang alkalde nga apisar sa nangin pag-asenso sang Bacolod, ini ang mas magasanyog pa tubtob sa mangin super city.
Sa pihak nga bahin, aminado man ini nga may mga pamangkot nga “Ngaa wala si Mayor Albee?” partikular na kun ini ang nagapadulong sa luwas sang pungsod.
Paathag sini nga ang mga madala sini pauli nga mga investment na lamang ang magaserbe nga sabat sa mga pamangkot.
Panindugan sang alkalde nga luyag sini nga bag-uhon indi lamang ang mga proseso, kasubong man ang social norms ukon ang mindset sang kumunidad.
Pahanumdom sini nga ang pagbag-o ang naga-umpisa sa kada isa gani ginapanawagan sini ang commitment sang mga Bacolodnon para sa pagbag-o.
Ginpasalamatan man sini ang mga opisyales sang syudad partikular na ang City Council, nga nakapasar sang 39 City Ordinances, napulo ka Aprobacion Ordinances kag 1,494 ka mga resolusyon.
Panindugan sang alkalde nga indi kinahanglan mangin supermen agud kita ang mangin Super City, masarangan man ini sang mga ordinaryo nga pumuluyo apang ini ang magakinahanglan sang Unity of Purpose kag Unity of Action.
Gani dapat magbuligay ang tanan para sa pagbag-o kag pag-asenso sang syudad sang Bacolod.
Ang SOCA ang gintambungan sang madamo nga mga guests kag VIPs samtang nasecure man sang maayo sang mga nakadeploy nga mga kapulisan kag iban pa nga security services.
