BACOLOD CITY-Patay ang duha ka tuig nga bata nga lalaki matapos nga mabungguan kag malapakan sang isa ka truck nga may karga nga kinaha sang softdrinks sa Sitio Ulalod, Barangay Oringao ciudad sang Kabankalan kahapon sang hapon.
Sa interview sang Bombo Radyo Bacolod kay Police Staff Sergeant Junrey Escorsuela, traffic investigator sang Kabankalan City Police Station, ginkilala sini ang biktima nga si Christian Andre Emperado samtang ang driver sang truck naman amo si Franklin Amorganda, 32-anyos sang Barangay Tamisu, Bais City, Negros Oriental.
Nagagwa sa imbestigasyon sang kapulisan nga padulong sa city proper sang Kabankalan ang truck sang hinali lang nga nagtabok ang biktima sa dalan bangud nakita sini nga nagpanaog sa jeep ang iya tiya nga gikan sa eskwelahan.
Ginhawiran pa ini sang isa niya ka tiya apang nakadalagan sa gihapon ang bitkima.
Dead on the spot ang bata kag nadunot gid ang lawas sini.
Priso karon ang suspetsado kag ginahulat pa ang desisyon sang pamilya sang biktima kun magapasaka sila sang kaso.
