BACOLOD CITY – Dakop ang isa ka persona samtang isa ang nakapalagyo sa ginpatigayon nga buybust operation sang Bacolod City Police Office-City Drug Enforcement Unit ukon BCPO-CDEU sa Purok Kalingawan, Sitio Sibucao, Brgy. Banago, ciudad sang Bacolod.
Sa interview sang Bombo Radyo Bacolod kay BCPO director Police Col. Henry Biñas kag pinuno sang CDEU, ginpahayag sini nga isa ka bulan na ang surveillance sa duha kag natiyempuhan kahapon.
Suno kay Binas, mabudlay man sudlon ang lugar bangud sa pala-pala palang ang mga pulis may yara na sang nagapalupok sang armas-luthang bilang patimaan nga may pulis nga nakasulod sa lugar apang natigayon sa gihapon nga madakpan sang CDEU si Joenel Vallangca, 38 anyos, kasado kag residente sang nasambit nga lugar.
Apang at large naman si Raymart Maat kag residente man sang nasambit nga lugar.
Suno sa city director, mga notorious ang mga suspetsado sa Sibucao kag mga remnant ini nanday Ramy Poja kag Leoner Jalandoon nga luyag magtake over sang nasambit nga sitio sa Brgy. Banago, bangud kun lantawon ang mga lugar nga ginatiniran ni Poja sang una, amo man ang lugar nga ginatiniran sang mga ini kag isa man ka rason nga madanlog dakpon ang mga ini.
Natigayon nga makuha sa mga ini ang mga P500 nga buybust money, siyam ka elongated sachet sang suspected shabu nga ginabanta nagabug-at sang 2 grams nga may yara sang market value nga P18,000 kag mga drug paraphernalia.
Samtang dakop man ang isa ka street level individual (SLI) sa ginpatigayon nga buybust operation sang Bacolod City Police Station 8 sa Purok Lawayan, Brgy. Banago, Bacolod City kahapon.
Sa interview sang Bombo Radyo Bacolod kay Police Major Charles Gever, newly identified street level individual ang suspetsado.
Yara sa Barangay Tangub kuntani ang transaksyon apang ginsaylo sa Banago gani didto ini nadakpan sang mga pulis.
Ginkilala ang suspetsado kay Ronrick Quiatchon, 29 anyos, single kag residente sang nasambit nga lugar.
Nakuha sa paghinakop sini ang pito ka sachet sang suspected shabu kalakip na ang P300 marked money.
Ginabanta nagabug-at kag 13 grams kag nagabalor sang P117 mil ang shabu.
Yara na karun sa paghinakop sang Police Station 8 ang suspetsado.
.
