Arestado ang duha ka lalaki matapos nga naaktuhan nga naghaboy sang sachet sang suspected shabu sang ginpapundo ang motorsiklo sa ginapatigayon nga Comelec checkpoint sa Murcia Road, Barangay Mansilingan, Bacolod City alas-10:37 kagab-i.
Ang mga suspect ang ginkilala nga sanday Alyas Aljon, 33 anyos kag Alyas Romnick, 26 anyos, lunsay single, wala sang trabaho kag residente sang Hacienda Valing, Barangay Blumintritt, sa banwa sang Murcia, Negros Occidental.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, sa pagpatigayon sang Comelec checkpoint sang Bacolod City Mobile Force Company, ginflagdown sang mga ini ang mga suspect nga naga-angkasanay sa motorsiklo.
Apang ginalantaw sini nga bangod sa kakulba, ginhaboy ni Alyas Aljon ang isa ka sachet sang suspected shabu.
Nakita naman mismo sang isa ka pulis ang pagpilak sang gina-alegar illegal nga droga, gani ang duha ang gilayon nga gin-aresto
Nahibaluan nga sa pagpatigayon sang Comelec checkpoint, plain view lamang ang mahimo matsekyar sang mga kapulisan, kag indi mapilit ang mga drivers nga magbukas sang compartment ukon manaog sa salakyan.
Magluwas sa suspected shabu, narecover man sa duha ang apat ka disposable lighter, isa ka whistle bomb nga palupok, kag kutsilyo nga nagalaba sang napulo ka pulgada nga nakuha naman kay Alyas Romnick.
