Arestado ang duha ka persona sa drug buybust operation nga ginpatigayon sa Purok Calong-Calong, Zone 1, Barangay Singcang-Airport alas-7:06 kagab-i.
Ang subject person ang ginkilala nga si John Celso Andrew Magsila, 28 anyos, tumandok sa Barangay Tiling, Cauayan, Negros Occidental kag ang himata sang iya live-in partner nga si Romer Guzon, 30 anyos, residente sa lugar.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, halos isa ka bulan naman nila nga ginamonitor ang subject.
Si Magsila ang nahibaluan nga naga-arkila lamang sang kwarto sa lugar kag diri ginatago kun may mag-abot nga supply sang illegal nga droga.
Samtang ini ang nagabulubisita lamang sa lugar, kag sa banwa sang Cauayan gid nagapauli kag gina-alegar nagatrabaho sa isa ka establishimento.
Nakuha sa ila paghinakop ang apat ka elongated plastic sachet, isa ka knot tied plastic kag lima ka big sachets sang suspected shabu kalakip na ang buybust item.
Ang suspected shabu ang ginabanta nagabug-at sang 51 gramos nga may standard drug price nga P346,800.
Sa pahayag ni Magsila, ini pa lamang ang una nga kahigayunan nga nadakpan may kaangtanan sa illegal nga droga, samtang ginaverify pa kun siya ang may iban nga previous cases.
