Nagalaom ang pamilya sang Bagonhon nga boksidor nga si Rogen Ladon nga makuha sini ang kampyonato sa flyweight division ukon 52 kilogram sang Southeast Asian Games.
Sa interview sang Bombo Radyo kay Jean Ladon-Delos Santos, magulang ni Rogen nga tumandok sang Brgy. Sampinit, Bago City, nagalaom ini nga bulawan nga medalya ang makuha sang iya manghod bangud ini ang iya nga handom.
Suno kay Delos Santos, nagafocus sa training ang 26 anyos nga utod kag sa tagsa nga siya ang magdaog, wala ini nagakalipat nga magbulig sa ila pamilya ilabi na nga nakalab-ot na ini sa international competition.
Antes sang SEA Games, nakadaog na si Ladon sa international tournaments kaangay sang Asian Amateur Boxing Championships kag Southeast Asian Games kag magagmay nga mga tournaments kaangay sang 2012 Taipei City Cup kag 2011 Hong Kong International Tournament.
Sang Agosto tuig 2018, nakuha man ni Ladon ang silver medal sa Asian Games nga ginpatigayon sa Jakarta, Indonesia.
Suno kay Delos Santos, mahiligon gid ang iya manghod sa boxing kag masami nga nagakapierde ang iya kasumpong.
Nagpanugyan man ini sa iya manghod nga magpangamuyo antes ang iya away sa ring.
Kampante naman ang amay sang isa pa gid ka Bagonhon nga boksidor nga makakuha sang medalya ang iya anak nga nagatiglawas sang Pilipinas sa Southeast Asian Games.
Ang 25 anyos nga si James Palicte sang Brgy. Sampinit, Bago City ang magadala sang hayahay sang Pilipinas sa welterweight ukon 64 kilogram division.
Sa interview sang Bombo Radyo sa amay ni James nga si Edmund Palicte, nakita na niya ang potensyal sang iya anak sang gamay pa ini gani gintutukan sini ang ikasarang sang iya anak.
Sa pagkamatuod, suno sa amay, nagsugod sa pagboxing ang iya anak sa edad nga anom.
Tatlo ka mag-ululutod sanday James kag lunsay man sila nagahampang sang boxing.
Suno sa amay, pila naman ka medalya ang nakuha sang iya anak sa international competitions.
Madumduman nga sang tinalikdan nga tuig, nakuha ni James ang silver medal sang Kings Cup sa Bangkok, Thailand kag bronze medal sa Belt and Road Boxing Tour sa Nanning, China.
