Natalana nga mapasakaan sang kaso ang duha ka hold-upper nga nakastiguhan sang mga pumuluyo sa Golden Commercial Complex sa Barangay Singcang-Airport, Bacolod City kahapon.
Nahibaluan nga nagpakuno-kuno nga magabakal ang isa sa mga suspect nga si Stephen John Villamil, residente sa Brgy Handumanan sa isa ka baligyaan sang 2nd hand nga cellphone.
Sang magdaho na sang cellphone ang biktima nga si Hiro Charita, siya ang gintayaan sang malaba nga gunting sa liog gani ginhatag na lamang sang biktima ang cellphone.
Gilayon nga nagdalagan ang suspect, kag didto na nagsinggitan ang biktima kag nagpangayo sang bulig.
Gilayon naman nga nagresponder ang mga nakabati nga pumuluyo tubtob nga nalab-ot ang suspect kag nakastiguhan.
Samtang suno naman kay Lenon Villarin, isa sa mga natumod nga suspect kag residente sa lugar, siya ang nagatulog lamang sang mabugtawan nga ginakastigo na si Stephen John.
Bangod ini ang iya abyan kag kaangay man nga bugaw sa lugar, gintinguhaan niya ini nga mabuligan apang siya ang kasubong man nga nasapote.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, natabuan man nga may police personnel sa lugar ilabi na nga ini ang ginakonsiderar nga high risk area.
Sang gina-aresto si Stephen John, nakuhaan man ini sang tatlo ka sachet sang suspected shabu sa iya nga bulsa.
Ang duha ang parehas man nga may record sa kapulisan kun sa diin si Lenon ang napriso na sadto bangod sa pagpangawat, apang panindugan sini nga siya ang nagbag-o na.
Samtang si Stephen John ang napriso naman bangod sa illegal gambling kag duha ka semana pa lamang sang nakagwa sa prisuhan.
Sa karun, liwat nga nabalik sa pagkapriso ang duha kun sa diin si Stephen John ang mahimo pasakaan sang kaso nga robbery-holdup kag Republic Act 9165 ukon Comprehensive Dangerous Drugs Act of 2002, samtang si Lenon ang mangatubang lamang sang kaso nga robbery-holdup.
