Naghimo na sang tikang ang Negros Occidental Police Provincial Office (NOPPO) agud indi makaguwa sa Pilipinas ang duha ka Iranian national nga suspetsado sa pagpangawat sa ciudad sang San Carlos.
Una diri, naaresto ang mga suspetsado nga sanday Ali Shajarat kag Mehren Adineh, lunsay 41-anyos matapos nila nga ginkawat ang P100,000 nga ginwithdraw sang assistant branch Manager sang isa ka remittance center nga ginkilala kay Karl Stephen Escobar, 24-anyos.
Yara sa sulod sang isa ka bangko si Escobar sa Brgy. 4, San Carlos sang ini ang gin-palipatan sang duha ka Iranians kun sa diin ang isa sa ila ang nag-istorya sa iya samtang ang isa naman ang nagkuha sang kwarta.
Sang namutikan ni Escbar nga ginkuha sang mga suspetsado ang kwarta, nagpangayo ini sang bulig sa mga personnel sang bangko gani naaresto ang mga ini.
Suno kay NOPPO Director Police Colonel Romeo Baleros, bangud nga bailable man lang ang kaso nga theft ang ipasaka batok sa duha, pwedi nga makapyansa ang mga ini kag makapalagyo.
Bangud sini, iya na ginmanduan ang hepe sang San Carlos City Police Station nga i-alerto ang Bureau of Immigration tuhoy sa duha kag makig-angot sa korte agud nga maka-issue sang hold departure order batok kanday Shajarat kag Adineh.
