Duha ka mga rebelde ang napatay sa nagluntad nga engkwentro batok sa militar sa Hacienda Paraiso, Brgy Caduha-an, Cadiz City kaina ala-1:51 sang kaagahon.
Sa interview sang Bombo Radyo Bacolod kay Lt Col. Arnel Calaoagan, commander sang 79th Infantry Battalion sang Philippine Army, nagdangat sa pito ang na-engkwentro sang mga tropa.
Suno diri, ang pagbayluhanay sang lupok ang naglawig sang pito tubtob walo ka minutos, apang indi man sagunson.
Gin-athag sini nga ang naka-engkwentro ang mga remnants sang dismantled Northern Negros Front nga naka-engkwentro man sang militar sang Pebrero.
Ang mga ini ang wala makapatigayon sang operasyon bangod sa rules of engagement ilabi na nga naganago ang mga rebelde upod sa komunidad.
Apang kaina sang kaagahon, natiyempuhan ang mga ini, kag wala na ginpahanugutan pa sang militar nga makalikaw nga nagresulta sa pagkapatay sang duha ka NPA members nga lalaki kag babayi.
Sa karun wala pa matumod ang identity sang mga ini kag ila pa nga ginapaverify sa mga mahimo nakakilala.
Apang nagapati si Calaoagan nga matag-as nga lider sang NPA ang mga napatay.
May mga armas-luthang man kag iban pa nga pagkabutang nga narecover sa encounter site.
Sa karun padayun ang hot pursuit operation kag ginapatsekyar man ang tracks agud matumod kun may iban pa nga pilason sa mga rebelde.
Wala naman sang nasamaran sa bahin sang militar.
Paathag ni Calaoagan ang militar ang wala nagakalipay kun may magluntad nga engkwentro, kaangay sang natabo nga may duha ka kabuhi ang napukan.
Panawagan sini sa mga rebelde nga samtang may tion pa, magsungka na kag magbalik sa sabak sang gobyerno kaangay sang iban nga mga nagsurrender nga sa karun nagapangabuhi na sang hilway.
