Ginaimbestigaran pa sang Negros Occidental provincial government kun indi hungod ukon may mensahe nga luyag ipalab-ot sa probinsya ang pagkasapo sang duha ka bala sang caliber .9mm pistol sa hagdanan sang Food Terminal Market sang Hulyo 3.
Suno kay Provincial Legal Officer Atty. Alberto Nillas Jr., ang insidente ang natabo kadungan man sa pagpatigayon sang renewal sang mga job order casual kag contract of service workers sa provincial capitol.
Pahayag sini nga samtang yara sa aktibidad, hinali na lamang nagreport ang isa ka human resource personnel natuhoy sa duha ka bala nga nasapwan nga tupong nga nagatuparay sa hagdanan sang Food Terminal Market.
Ginalantaw ang posibilidad nga hungod ang pagbilin sang mga bala bangod ini ang tupong nga kaangay nga ginplastar gid sa hagdanan apang wala gihapon ginadula ang posibilidad nga ini ang nabilin ukon nadagdag lamang.
Suno kay Atty. Nillas, gintawag na nila ang atensyon sang Security and Safety Division agud mag-imbestigar kun sa diin sila ang nakapasa na sang findings kag may natumod naman nga persons of interest.
Isa sa ginalantaw nila ang posibilidad sang kaangtanan sa renewal sang mga job order kag contract of service workers, ilabi na nga may-ara sang mga ginlay-off kag wala na ginpahanugutan nga makarenew.
May kabudlayan naman ang mga ini sa pagtsekyar sa CCTV footage bangod malayo sa angulo sang camera.
Suno kay Atty. Nillas, ang probinsya ang nagpagwa naman sang mando sa pagdumili sang firearms sa provincial capitol, mga provincial offices kag mga ospital.
