Ginpahayag sang chairman sang Committee on Transportation sa Sangguniang Panlungsod sa syudad sang Bacolod nga nagpasalig na sa iya ang Sentrong Samahan ng mga Tsuper at Operators Negros (SSTONE) kag Federation of Bacolod City Drivers Association (FEBACDA) nga indi sila maga-upod sa plano nga transport strike sang United Negros Drivers and Operators Center (UNDOC) antes matapos ang bulan sang Marso.
Madumduman nga ang ginapakigbato sang mga katapo sang UNDOC kun ngaa ginduso nila ang transport strike agud nga mabatian ang ila nga panawagan may kaangtanan sa modernization program sa bahin sang mga jeepneys nga magatake-effect na sa Abril 1, kasubong man ang panawagan nga pagpalos na sang excise tax sa petroleum products ilabi na karun nga tuman ka dako ang pagsaka sang presyo sang gatong.
Suno kay Bacolod City Councilor Dindo Ramos, nakigsapol na ini upod sa transport sector sa syudad sang Bacolod kun sa diin nagkumpirmar na ang SSTONE kag FEBACDA nga indi makigbahin sa transport strike.
Paathag sang konsehal nga ang desisyon sang duha ka transport groups ang kasunod sang pagpahanumdom niya sa mga ini nga ang drivers man kag operators sa gihapon ang maga-antos sa tion nga mag-untat sang byahe.
Bisan ini ang indi paman komporme nga ipatuman na ang modernization program sa madali nga panahon, apang wala ini sang mahimo sa karun kundi ang magbulig sa implementasyon bangod kabahin ini sa iya nga mandato.// Pahanumdom man ni Ramos nga si Diego Malacad, Secretary-General sa UNDOC ang indi man operator sang Public Utility Jeepneys (PUJs) gani indi man ini apektado hinali nga mag-untat sang byahe kag ang mga drivers lang amo ang magutuman.
Panugyan sang konsehal nga kun nagapamatok sa modernization program, indi dapat sa local government unit (LGU) magaprotesta kundi dapat nga ipadangat ini sa kongresista nga sarang makahuman sang resolusyon sa temporaryo nga pagpauntat sang modernization program.
Sa pihak nga bahin, ginpahayag man ni Ramos nga may financial assistance man sila nga ginahatag sa limitado nga numero sang mga drivers sa idalum sang iya nga ginduso nga programa nga “financial subsidy on individual in crisis situation”.
Ang pondo ang para kuntani sa mga pumuluyo ano paman nga sektor nga tuman ka nahalitan sang COVID-19 pandemic.
Bisan may budget ang gobyerno, ginakasubo sang konsehal nga indi tanan ang mahatagan bangod gamay lang ang napartiniser nga pondo.
Aminado naman ang konsehal nga makaluluoy ang mga drivers bangod dyutay ang pasahero tuga sang wala pa ang face-to-face classes, pagsaka sang plete kag indi man ang mga ini makapasakay sang 100 nga capacity.// Suno kay Ramos, ang Land Transportation Franchising and Regulatory Board (LTFRB) Region 6 ang nagpasalig naman nga iduso man nila ang resolusyon sini nga dugang nga isa ka tuig sa probationary authority sa mga traditional jeepneys.
