Narecover kahapon sang aga ang bangkay sang estudyante samtang padayun pa nga ginapangita ang isa pa, matapos maanod sa suba sa Brgy. Malubon, Sagay City sang Biyernes.
Nahibaluan nga kapin 10 ka mga estudyante ang nagpaligo sa suba sa Prk Jordan, Brgy Fabrica, Sagay City kadungan sa kaadlawan sang isa nila ka kaupod, apang tatlo sa ila ang na-anod bangod sa hinali nga pagbaskog sang daludo sang tubig.
Una nga narescue ang isa, apang ang 15 kag 16 anyos nga lalaki ang wala matabangan.
Nakaangkon naman sang kabudlayan ang pagpangita bangod sa malubog nga tubig sa suba.
Nasapwan kag narecover sang Bantay Suba ang bangkay sang isa sa mga biktima sa pangpang sang suba alas-10:16 kahapon sang aga.
Nakita man ang bangkay sang isa pa kahapon sang hapon, apang wala marecover matapos maglugdang.
Magapadayun pa ang joint search and retrieval operations ang Coast Guard Sub-Station Sagay, Coast Guard Special Operations Unit – Northern Negros Occidental, City Disaster Risk Reduction and Management Office – Sagay kag iban pa nga local agencies para sa pagpangita sang nabilin nga missing.
