Yara na sa kustodiya sang kapulisan ang “person of interest” may kaangtanan sa mass shooting nga natabo sa Brown University sa Rhode Island, USA nga nagresulta sa pagkamatay sang duha ka estudyante kag siyam nga nasamaran sang Sabado.
Ginpahayag sang Brown University nga gin-lift na sang kapulisan ang shelter-in-place order sa ila campus.
Masobra 400 ka law enforcement personnel ang gin-deploy sang Sabado samtang ginapangita sang kapulisan ang suspek nga nagsulod sa isa ka building nga may dala sang armas samtang naga-exam ang mga estudyante.
Sang Sabado, napuno sang mga emergency vehicle ang mga dalanon sa palibot sang campus sa pagpangita sa armado nga suspek.
Nagbulig man sa imbestigasyon ang mga ahente sang Federal Bureau of Investigation (FBI) kag sang Bureau of Alcohol, Tobacco, Firearms and Explosives (ATF) upod sa lokal kag state police.
Ginpagwa sang mga opisyal ang isa ka video sang suspek nga isa ka lalaki nga ginabanta nga yara sa edad nga 30-anyos pataas kag nagasuksok sang itom nga bayo.
Suno kay Providence Deputy Police Chief Timothy O’Hara, posible nga nagasuksok sang maskara ang suspek apang indi pa ini sigurado.
Suno kay Police Chief Oscar Perez sa isa ka press conference, gina-usisa pa sang mga detective kun ngaa ang eskwelahan ang ginpili bilang target.
Ginpahayag ni Brown University President Christina Paxson nga halos tanan sang mga biktima ang mga estudyante.
