Pilason ang duha ka lalaki matapos ginbuno sa Glendale Homes Subdivision, Purok Mirasol, Barangay Granada, Bacolod City, kahapon sang kaagahon.
Ang mga biktima ang ginkilala nga sanday Jeve Suyom, 39 anyos kag Joven Palomata, 21 anyos samtang ang mga suspetsado naman amo sanday Bong Bong Sasi, kag Rodel Gersaba, kag sila ang lunsay mga residente sang nasambit nga lugar.
Sa interview sang Bombo Radyo kay Police Major Joery Puerto, station commander sang Police Station 5, anum sila tanan ang magkaupod nga naga-inom sang makahulubog nga ilimnon apang ang duha diri ang nag-una pauli bangod nga may yara na sang paglalisay.
Sang apat na lamang sila ang nabilin, nagdesisyon naman ang isa diri nga magpauli apang sang nagasaka ini sa iya motorsiklo, hinali na lang ini nga ginlampusan sang botilya sa ulo sang isa ka suspek.
Gilayon nga nagkinagamo kun sa diin nagluntad ang pagbinun-anay.
Pilason ang duha ka biktima nga gindala sa Corazon Locsin Montelibano Memorial Regional Hospital (CLMMRH) samtang ang duha naman ka suspetsado ang naaresto kag yara na sa kustodiya sang Police Station 5.
