Mapalaron nga nasalbar sa Silay City ang duha ka mananagat nga halos isa ka adlaw sa lawod matapos mabulag sa ila nga sakayan-pandagat gikan sa banwa sang Valladolid.
Sa interview sang Bombo Radyo Bacolod kay Jose Carlo Juderial, 52 anyos sang Barangay Gwa Banwa, Valladolid, sila ang naghalin upod sa iya pakaisa nga si Rubin Fajardo, 42 anyos, alas-12:00 sang udto kahapon nga maayo pa ang tiyempo.
Apang alas-4:00 sang hapon hinali nga nagbaskog ang hangin tubtob nga natalupangdan ni Fajardo ang tuman ka dako nga balod.
Nagtinguha sila nga makalikaw apang nalab-ot kag nabulag sa ila nga pump boat.
Suno diri, nautod ang katig sang ila pump boat nga amo ang gindakop ni Fajardo kag ila nga duha nga gin-uyatan.
Naglangoy sila padulong sa Pulupandan kag malapit na lamang sila kuntani apang sila ang ginabutong sang current sang tubig palayo.
Bangod sini sila ang nagpadala na lamang sa balod tubtob nga nakadangat sa kadagatan sang Silay.
Didto na kag may nakarescue sa ila nga nagdala sa ila sa takas.
Sila ang ginpakaon man kag ginpakape sang nagbulig sa ila.
Ang pump boat ang narecover naman sa banwa sang Pulupandan.
Suno kay Juderial, siya ang masobra 20 ka tuig na nga nagapanagat kag makapila ka beses naman nakaeksperyensya sang kaangay nga sitwasyon samtang si Fajardo ang lima pa lamang ka tuig sa pagpanagat.
Paathag sini nga wala man sila nagpanagat sang nagabagyo kag makanay naman ang tiyempo sa maglakat.
Panindugan sini nga ang ila pagrisgo ang sugo sang kapigaduhon agud may mapakaon sa iya pamilya kag masuporta sa pag-eskwela sang iya kabataan.
