Patay ang duha ka mananagat nga lunsay mga residente sang Bohol matapos nga matrap sa baybayon sang Apo Island, Negros Oriental sang Mayo 22.
Ang mga biktima ang ginkilala nga kanday Joel Tapsilan kag Bobong Daomani, mga residente sang Dauis, Bohol kag mga miyembro sang Badjao Community.
Sa interview sang Bombo Radyo Bacolod kay Lt. Marionne Abigail Enopia, station commander sang Coast Guard Station, Negros Oriental, kahapon ang Coast Guard Apo Island substation ang nakabaton sang tawag gikan kay Rondelmo Amoranda nga residente sang Dauis, Bohol nga nagreport sang duha ka mananagat nga missing.
Suno kay Enopia, ginpahayag ni Amorganda nga sang Mayo 20 alas 10:00 ang takna sang aga naglakat siya kaupod ang duha padulong sa Apo Island.
Dugang pa sini nga nagpatigayon sang illegal fishing ang duha.
Sa tion sang ila nga compressor fishing may yara sila sang nasugata nga wala matumod nga persona nga nakasakay sa rubber boats nga dumdom sang mga ini nga mga Bantay-Dagat.
Bangud sa kakulba gin-utod sang mga ini ang hose nga nagaangot sa compressor kag ginbilin ang duha sa dalom sang dagat.
Gintap naman sang substation personnel ang Department of Environment and Natural Resources (DENR) sa Apo island kag nagpatigayon sila sang search operation.
Nakig-angot man ang Coast Guard personnel sa nagdive kun sa diin nasapwan ang duha nga wala na sang kabuhi nga yara sa idalom sang dagat.
Ang bangkay sang duha ang ginturn-over sa Dauis Municipal Police Station para sa dugang nga imbestigasyon kag pagcontact sa mga pamilya sang mga ini.
