Nakita na sa probinsya sang Masbate ang duha ka namissing na mga mananagat sa ciudad sang Cadiz, Negros Occidental, kahapon.
Ang namissing ang ginkilala nga sanday Edwin Hinojales, 17 anyos, Grade 11 student kag Joren Parochel, 22 anyos, lunsay residente sang Purok Pasil, Talabahan, Barangay Zone 1, Cadiz City.
Madumduman nga nagpalawod ang duha sang Oktubre 24, alas- 10:00 sang aga kag wala na nakapauli pa.
Sa interview sang Bombo Radyo Bacolod kay Commander Jansen Benjamin, commander sang Coast Guard Station-Northern Negros Occidental, posible nga bangod sa malain nga tiyempo amo nga wala nakabalik pauli ang duha samtang ginakumpirmar pa kun ano ang natabo sa ila sa tunga sang lawod.
Suno kay Benjamin, nakacontact ang duha sa ila pamilya kag nakumpirmar nga sila ang yara sa Brgy Nabotcot, banwa sang Placer, Masbate.
Sa karun ang duha ang yara sa kustodiya sang Philippine Coast Guard – Masbate.
