Nagwa na ang resulta sang postmortem examination sang duha ka mga bangkay sang tawo nga nagakaagnas na nga nasapwan sa parking area sang First Farmers Holding Corporation sa Barangay Dos Hermanas, Talisay City, Negros Occidental sang Agosto 29.
Sa interview sang Bombo Radyo Bacolod kay Police Lt Col. Alvin Christopher Baybayan, hepe sang Talisay City Police Station, santo sa resulta sang nasambit nga examination, deep penetrating trauma ang rason sang kamatayon sang mga ini.
Ang deep penetrating trauma ang pilas nga gintuga sang matalum ukon high-velocity projectile sa lawas sang tawo.
Suno kay Baybayan, indi man matumod kun ang pilas ang tuga sang gunshot bangud mabudlay na ini nga makita bangud nagakaagnas na ang bangkay.
Samtang may yara sang ginasundan nga anggulo ang mga kapulisan sa karun bangud sa tattoo sang lalaki nga bangkay nga George Flores.
Suno diri, ang biktima mahimo nga napriso sa Handumanan District Jail kag katapo sang grupo ni Flores.
Ang nasambit nga persona santo sa natipon nga impormasyon sang Talisay City Police Station nga isa ini ka priso nga imbulbado sa illegal nga druga nga yara na sa paghinakop sang Bureau of Corrections.
Madumduman nga ang duha ang may yara sang tattoo nga posible palaagyan agud nga matumod ang duha ka mga bangkay.
Ang isa ka bangkay nga isa ka lalaki ang may tattoo sa natuo nga butkon nga dragon ang design kag sa iya nga natuo nga paa ang may tattoo man nga George Flores kag dugang pa nga tattoo ang initials nga PLD.
Samtang ang babayi nga bangkay ang may yara man sang tattoo sa nawala nga dughan nga isa ka bulak kag may tattoo man ini sa natuo nga hita nga isa man ka bulak.
Sa karun nagapabilin nga wala sang identity ang duha ka mga nagakaagnas na nga mga bangkay.
